मेलम्चीको पानी छिट्टै ल्याउन विकल्पसहित तयारी : मन्त्री मगर

0
228

काठमाडौं, फागुन १० । खानेपानीमन्त्री बीना मगरले जुनसुकै प्रक्रिया अपनाएरपनि छिट्टै राजधानीमा मेलम्चीको पानी ल्याउने तयारी मन्त्रालयले गरिरहेको बताएकी छन् ।

Advertisements

प्रतिनिधिसभाको शुक्रबारको बैठकमा ‘मेलम्ची खानेपानी आयोजनाको खानेपानी काठमाडौंवासीले कहिले पिउन पाउँछन् ?’ भन्ने सांसद डिला संग्रौलाले सोधेकोे प्रश्नको जवाफमा मन्त्री मगरले सीएमसीले ठेक्का छाडेकाले पूर्वनिर्धारित् तालिकानुसार पानी आउन नसकेको बताइन् ।

‘अहिले मन्त्रालय दुईओटा विकल्प लिएर अघि बढेको छ । पहिलो सीएमसी आए छिटो समस्या समाधान हुन्छ, पानी छिटो आउँछ । यसैले सरकारले संयमतापूर्वक छलफल अघि बढाएको छ । पुनः बोलपत्र आह्वान गरी छिटो पानी ल्याउने अर्को तयारी पनि गरिएको छ’–उनले भनिन् ।

मन्त्रालयका पूर्वसचिव गजेन्द्रकुमार ठाकुर र मन्त्रीबीचको विवाद र सीएमसीसँग कमिसन मागिएका सम्बन्धमा भइरहेको ‘सार्वजनिक टीका–टिप्पणीको सत्यतथ्य के हो ?’ भनी सांसद संग्रौलाले पूरक प्रश्न राखेकी थिइन् ।

सांसदका पूरक प्रश्नको उत्तर दिँदै मन्त्री मगरले मेलम्ची आयोजनालाई आफू मन्त्री भएर आएपछि गतिका साथ अघि बढाएकाले तुलनात्मकरुपमा काम भएको जिकिर गरिन् ।

‘म आएपछि धेरै काम भएको हो । निर्माण कम्पनी सीएमसीको लापरबाहीले परिणाम दिन सकिएन। सुरुङ ‘ब्रेक थ्रु’ र ‘भ्यान्टिलेसन’ निर्माण प्रक्रिया सुरु हुनु, फिनिसिङ अन्तिम चरणमा पुग्नु यसका उदाहरण हुन्’–उनले भनिन् ।

सीएमसी गएपछि अन्योल छाउनु दुर्भाग्य भएपनि त्यसको भोलिपल्टदेखि नै कसरी काम अघि बढाउने भन्ने विषयमा मन्त्रालयले गृहकार्य गरिरहेको जानकारी उनले संसदलाई दिइन् ।

छिटो पानी ल्याउन सरकारका तर्फबाट निरन्तर प्रयत्न भइरहेको बताउँदै मन्त्री मगरले सीएमसी नआएपनि तीव्ररुपमा काम गर्नेगरी पुनः बोलपत्र आह्वानको तयारी गरिएको सुनाइन् । दुवै प्रयास समानान्तररुपमा भइरहेको उनको भनाइ थियो ।

‘भेन्डर’को समस्या समाधान गर्न सीएमसी आए सहज हुने भएकाले त्यसको प्रयास भइरहेको जनाइएको छ ।

ठेक्काको मान्यताभित्र रहेर काम गर्नेगरी आए सीएमसीलाई स्वागत गरिने तर विधिबाहिर गएर काम गर्न नसकिने मन्त्री मगरले बताइन् ।

‘मेरो सफलताको विषय पनि हो, मेलम्ची आयोजना । पूर्वसचिवलाई पहिलो प्राथमिकतामा राखेर मेलम्चीको काम गर्न निर्देशन दिएकामा नगरेपछि सरुवा भएको हो’–उनले भनिन् ।

आफू आएपछि रु ८४ करोड १५ लाख मेलम्ची आयोजनाले भुक्तानी दिएकामा रु एक अर्ब खाएको भनी प्रचार गरिएकामा मन्त्री मगरले आपत्ति जनाइन् ।

मेलम्चीको विकल्पकारुपमा उपत्यकाका महादेवखोलालगायत पानीको स्रोतकाबारेमा छलफल भइरहेको मन्त्रालयले जनाएको छ ।

यससम्बन्धी प्रस्ताव अर्थ मन्त्रालयमा पनि पुगेको उनले प्रतिनिधिसभालाई जानकारी दिइन् ।

मेलम्चीको पाइप छिटो बिछ्याइ सकेर सडक बनाउने तयारी भइरहेको छ ।

उपत्यका वरपर जलाधार क्षेत्र घोषणा गर्ने गतिमै मन्त्रालयले काम गरिरहेको उनले बताइन् ।

मेलम्ची आयोजना हेर्न स्थलगतरुपमा जाँदा बनाइएको कार्ययोजनानुसार नै आफूले पानी आउने मिति घोषणा गरेको जानकारी पनि उनले दिइन् ।

त्यसअघि पूरक प्रश्न गर्दै सांसद राजेन्द्रकुमार केसीले ‘गत वैशाखमै पानी आउँछ भनी भाषण भइरहेको थियो, किन ढिलाइ भयो ? अब पानी आउने प्रस्ट तिथिमिति जानकारी पाऔं’ भनी माग गरेका थिए ।

सांसद महेश बस्नेतले ‘मेलम्चीले पाइप विस्तार गरेको स्थानका सडक असरल्ल छ, कहिले बन्छ ?’ भन्दै सरोकार भएका निकायलाई राखेर मन्त्रालयले बहस गर्नुपर्ने सुझाव दिए ।

सांसद गगनकुमार थापाले ‘पूर्वसचिव ठाकुरले सीएमसीलाई रु तीन करोड दिएर फर्काउन नमान्दा आफू सरुवामा परेको भनी दिएको सार्वजनिक टिप्पणीमा दोषी को हो ? जान्न पाउने जनताको अधिकार रहेको’ भनी ध्यानाकर्षण गराए ।

सांसद प्रेम सुवालले ‘चार आर्थिक वर्षसम्म समय तोक्दा पनि काठमाडौं उपत्यकामा पानी नआएकाले उपत्यका वरपरका जलाधारको संरक्षण गर्ने सम्बन्धमा मन्त्रालयको के कार्यक्रम छ ?’ भनी प्रश्न राखेका थिए ।

सांसद बहादुरसिंह लामाले सीएमसी कम्पनीले ९५ प्रतिशत काम गरेको भनिएपनि कागजातको अध्ययन गर्दा ८० प्रतिशतमात्र काम भएको देखिने बताए । रासस

LEAVE A REPLY